देउवा र प्रचण्डलाई दायाँबायाँ राखेर कांग्रेस नेता रामचन्द्रले दिए राष्ट्रपतिमा उम्मेदवारी

काठमाडौं– कांग्रेसका वरिष्ठ नेता एवं पूर्वसभामुख रामचन्द्र पौडेलले राष्ट्रपति पदमा उम्मेदवारी दर्ता गराएका छन्। पौडेलले शनिबार संघीय संसद् भवन नयाँ बानेश्वर परिसरमा रहेको निर्वाचन अधिकृतको कार्यालयमा पुगेर मनोनयन दर्ता गराएका हुन्। 

पौडेलको सभापति प्रस्तावकमा शेरबहादुर देउवा, माधवकुमार नेपाल, नारायणकाजी श्रेष्ठ, अशोककुमार राई र अब्दुल खान रहेका छन्। समर्थकमा महन्थ ठाकुर, पूर्णबहादुर खड्का, रञ्जिता श्रेष्ठ, चित्रबहादुर केसी र हितराज पाण्डे रहेका छन्। 

पौडेललाई माओवादी केन्द्र, जसपा, नेकपा एस, नागरिक उन्मुक्ति पार्टी, लोसपा, जनमत पार्टी र राष्ट्रिय जनमोर्चाले समर्थन गरेका छन्। यसअघि एमालेबाट पूर्वसभामुख सुवास नेम्बाङले राष्ट्रपतिका लागि मनोनयन दर्ता गराएका थिए। पौडेल आठ दलीय गठबन्धनका साझा उम्मेदवार हुन् भने नेम्बाङ सत्तारुढ एमालेबाट उम्मेदवार बनेका हुन्।