काठमाडौं– निर्वाचन आयोगले राष्ट्रपति र उपराष्ट्रपतिका लागि निर्वाचनमा उठेका उम्मेदवारलाई चुनावी खर्चको सीमा तोकिदिएको छ।
राष्ट्रपति/उपराष्ट्रपति निर्वाचनका लागि अन्तिम नामावली प्रकाशन भएपछि प्रचार–प्रसार गर्न सक्ने आयोगले बताएको छ।
निर्वाचनसम्बन्धी ऐनको दफा ६२ मा मनोनयनपत्र दर्तादेखि परिणाम घोषणासम्मको अवधिमा राष्ट्रपति तथा उपराष्ट्रपतिका उम्मेदवारले अधिकतम चार लाखसम्म खर्च गर्न पाउने उल्लेख छ।
आयोगका अनुसार सवारी साधन र गोष्ठी तथा छलफलमा १/१ लाख, कार्यालय सञ्चालनमा ६० हजार, प्रतिनिधि परिचालनमा ४० हजार, विविधमा २४ हजार, सवारी इन्धन, प्रचार–प्रसार सामग्री, अन्य प्रचार–प्रसार, छापा एवं विद्युतीय माध्यममा २०/२० हजार, ढुवानीमा १५ हजार र मतदाता नामावली खरिदमा १ हजार खर्च गर्न पाइने कानुनी प्रावधान छ।
मंगलबार बेलुकी ५ बजे राष्ट्रपति उम्मेदवारको अन्तिम नामावली प्रकाशन भएपछि बुधबार (१७ फागुन)देखि ५ चैतसम्म आचारसंहिता लागू हुनेछ। २५ फागुनमा राष्ट्रपति र ३ चैतमा उपराष्ट्रपतिको निर्वाचन हुँदै छ।
राष्ट्रपति निर्वाचनमा कांग्रेसबाट वरिष्ठ नेता रामचन्द्र पौडेल र एमालेबाट उपाध्यक्ष सुवास नेम्बाङले उम्मेदवारी दिएका छन्। राष्ट्रपति निर्वाचन सकिएलगत्तै उपराष्ट्रपति निर्वाचनका लागि आयोगले मनोनयन खुलाउनेछ।
प्रकाशित: Feb 28, 2023| 12:34 मंगलबार, फागुन १६, २०७९
