राष्ट्रपति निर्वाचनका लागि अभिमुखीकरण कार्यक्रम गर्दै कांग्रेस

काठमाडौं- नेपाली कांग्रेसले राष्ट्रपति निर्वाचनलाई लक्षित गरेर सांसदहरुका लागि अभिमुखीकरण कार्यक्रम आयोजना गर्ने भएको छ।

यही फागुन २५ गते हुने राष्ट्रपति निर्वाचनका लागि १८ फागुनमा अभिमुखीकरण कार्यक्रम राखिएको हो। कार्यक्रममा कांग्रेसका साथै आठ दलीय गठबन्धनमा आवद्ध सबै दलका सांसदलाई बोलाइएको छ। 

राष्ट्रपति निर्वाचनमा संघीय संसद् र प्रदेशसभाका सांसद मतदाता हुन्छन्। आजमात्रै आठ दलीय गठबन्धनबाट राष्ट्रपतिका रुपमा अगाडि सारिएका कांग्रेस वरिष्ठ नेता रामचन्द्र पौडेलले प्रतिनिधिसभा, राष्ट्रिय सभा र प्रदेशसभाका सांसदसमक्ष मत माग्दै पत्र पठाएका छन्।

राष्ट्रपति निर्वाचनमा ८८२ मतदाता छन्। नेता पौडेलले संविधानको सीमाभित्र रहेर देशको सेवा गर्न चाहेको बताउँदै सबै मतदातालाई व्यक्तिगत रूपमा पत्र पठाएका हुन्। 

यसअघि कांग्रेसले एमालेसहितका सबै दललाई मत माग्दै पत्र पठाइसकेको छ। राष्ट्रपतिको निर्वाचनमा पौडेलसँग एमाले नेता तथा पूर्वसभामुख सुवास नेम्बाङ प्रतिस्पर्धामा छन्।