प्रदेशसभाबाट विश्वासको मत लिँदै बागमतीका मुख्यमन्त्री

काठमाडौं– बागमती प्रदेशका मुख्यमन्त्री शालिकराम जम्मकट्टेलले आगामी ८ चैतमा प्रदेशसभाबाट विश्वासको मत लिने भएका छन्। मुख्यमन्त्रीले विश्वासको मत लिन प्रदेशसभा सचिवालयले ८ चैत दिउँसो ३ बजेका लागि बैठक बोलाएको हो।

प्रदेशसभा सचिवालयका प्रमुख सचिव कृष्णहरि खड्काका अनुसार केही साताअघि राप्रपाले सरकारमा सहभागी आफ्ना तीन मन्त्रीलाई फिर्ता बोलाउने र सरकारलाई दिएको समर्थन लिने निर्णय गरेपछि मुख्यमन्त्रीले पुनः सदनबाट विश्वासको मत लिन लागेका हुन्।

राप्रपा सरकारबाट बाहिरिएसँगै जम्मकट्टेलको सरकार अल्पमतमा परेको छ। गत २६ पुसमा बागमती मन्त्रिपरिषद् गठन हुँदा एमाले, नेकपा माओवादी केन्द्र र राप्रपाको संयुक्त गठबन्धन बनेको थियो। बागमती प्रदेश सरकारको वर्तमान मन्त्रिपरिषद्मा माओवादी केन्द्र र एमालेका मात्रै मन्त्री छन्।