नयाँ मन्त्रीको नियुक्ति र शपथ शुक्रबार हुने

काठमाडौं- मन्त्रिपरिषद् विस्तार शुक्रबार हुने भएको छ। बिहीबार नै मन्त्रिपरिषद विस्तार गर्नेगरी दलहरुले दौडधुप गरे पनि त्यो सम्भव भएन।
केही मन्त्रालयमा धेरै दलको दाबी रहेका कारण बिहीबार मन्त्री नियुक्ति हुन नसकेको हो।

प्रधानमन्त्रीको सचिवालयका अनुसार शुक्रबार दिउँसो ३ बजे नयाँ मन्त्रीको शपथका लागि राष्ट्रपति कार्यालयलाई खबर गरिएको छ। त्यसअघि गठबन्धनको बैठक बसेर मन्त्रीहरुको टुंगो लगाइनेछ। अर्थ, गृह, रक्षा, सञ्चारलगायतमा समस्या नभए पनि केही मन्त्रालयमा विवाद छ।

प्रधानमन्त्री पुष्पकमल दाहाल प्रचण्डले सत्ता साझेदार दलहरुलाई शुक्रबार बिहान मन्त्रीको नाम दिन आग्रह गरेका छन्। त्यसका लागि प्रधानमन्त्री प्रचण्ड सत्ता साझेदार दलहरुसँग सामूहिक र एक्लाएक्लै संवादमा पनि छन्।

सत्ता साझेदार दलहरुका बीचमा कांग्रेसले ८, माओवादी केन्द्रले ५, एकीकृत समाजवादी र जनता समाजवादी पार्टी (जसपा) ले २/२ र जनमत पार्टी, लोकतान्त्रिक समाजवादी पार्टी, नागरिक उन्मुक्ति पार्टी र नेपाल समाजवादी पार्टीले १/१ मन्त्रालय पाउने समझदारी बनेको छ।