एसईई स्थगितको विरोधमा विद्यार्थीको प्रदर्शन, बाराको अवस्था तनावग्रस्त

काठमाडौं - प्रदेश २ मा एसईई परीक्षा स्थगित भएको विरोधमा विद्यार्थीहरुले प्रदर्शन थालेका छन्। प्रदेश २ का जिल्लामा विद्यार्थीहरु बिहानैदेखि आन्दोलनमा उत्रिएका छन्। प्रदर्शनमा उत्रीएका विद्यार्थीहरुले राजमार्ग अवरुद्ध गर्दै प्रदर्शन थालेका छन्। 

यसैबीच बारामा भएको प्रदर्शन झडपमा परिणत भएको छ। एसईई परीक्षा स्थगित भएको विरोधमा प्रदर्शनमा उत्रिएका विद्यार्थी र प्रहरीबीच शनिबार बाराको जितपुरमा झडप भएको हो। बाराको कलैया तथा जितपुरमा भएको झडपमा दुईजना प्रहरी घाइते भएका छन् । प्रदर्शनमा उत्रिएका विद्यार्थीको भीडलाई नियन्त्रणमा लिन प्रहरीले हवाई फायर गरेको छ भने अश्रृग्याससमेत प्रहार गरेको छ। आक्रोशित विद्यार्थीहरुले प्रहरीको गाडीमा तोडफोड गर्नुकासाथै आगजनीसमेत गरेका छन्।

सप्तरीमा पनि विद्यार्थीले बिहानैदेखि प्रदर्शन गरेका छन्। उनीहरुले पूर्व पश्चिम राजमार्ग अवरुद्ध पारेका छन्।

प्रश्नपत्र आउट भएपछि सरकारले प्रदेश २ मा एसईई परीक्षा स्थगित गर्ने निर्णय गरेको थियो। परीक्षा स्थगित भएपछि विद्यार्थीले आन्दोलन थालेका छन्।