अष्ट्रेलियामा आकाशबाट ‘हात धुन’ सन्देश

कोरोना भाइरस (कोभिड–१९) को संक्रमण बढेपछि अष्ट्रेलियाले सचेतनामूलक कार्यक्रमहरु गरिरहेको छ। यसै क्रममा अष्ट्रेलियाको आकाशमा हात धुने सन्देश दिन थालिएको छ।

आकाशमा हात धोऔं (वास हेन्ड्स) लेखेर सन्देश दिन थालिएको हो। त्यहाँ १२६ जनामा कोरोना भाइरसको संक्रमण देखिएको छ । अष्ट्रेलियाली स्वास्थ्य मन्त्रालयका अनुसार बिहीबार बिहानसम्ममा कोरोना संक्रमणको कारण ३ जनाको ज्यान गएको छ ।

अष्ट्रेलियाको न्यू साउथ वेल्समा सबैभन्दा धेरै ६४ जना संक्रमित फेला परेका छन् । त्यस्तै भिक्टोरियामा १८ जनामा, कुइन्सल्याण्डमा १७ जनामा कोरोना संक्रमण देखिएको छ ।

दक्षिण अष्ट्रेलियामा ८ जना, पश्चिम अष्ट्रेलियामा ७ जना र तास्मानियामा २ जना संक्रमित भएको स्वास्थ्य मन्त्रालयले जनाएको छ । डायमण्ड प्रिन्सेस पानीजहाज चढेका १० जनामा संक्रमण फेला परेको छ।