कल्याणपुर नगरपालिकाका मेयरविरुद्ध भ्रष्टाचार मुद्दा, छोरा पनि मुछिए

काठमाडौं– सिरहाको कल्याणपुर नगरपालिकाका मेयर सूर्यनाथ मण्डल र उनका छोरा सन्तकुमार मण्डलविरुद्ध अख्तियार दुरुपयोग अनुसन्धान आयोगले मुद्दा दायर गरेको छ।

उनीहरुविरुद्ध अख्तियारले ५ लाख रुपैयाँ बिगो माग दाबी गर्दै बुधबार विशेष अदालतमा मुद्दा दायर गरेको हो।

मेयर सूर्यनाथले विस्तृत परियोजना प्रतिवेदनको भुक्तानी दिनका लागि सेवाग्राहीसँग घूस माग्दै रकम लिनका लागि छोरालाई पठाएको खुलेको छ। आयोगको कार्यालय बर्दिवासबाट खटिएको टोलीले सन्तकुमारलाई ५ लाख घूससहित नियन्त्रणमा लिएको थियो।

सूर्यनाथले कार्य सम्पन्न भैसक्दा पनि चेक नदिएर हैरानी तुल्याएको उजुरी आयोगमा परेको अख्तियारका प्रवक्ता तारानाथ अधिकारीले जानकारी दिए।