औद्योगिक क्षेत्रको पूर्वाधार विकास र सञ्चालनका लागि ३३ करोड

बजेट २०८०/८१

गृहपृष्ठ
बजेट २०८०/८१

औद्योगिक क्षेत्रको पूर्वाधार विकास र सञ्चालनका लागि ३३ करोड

क्यापिटल नेपालसोमबार, जेठ १५, २०८०

काठमाडौं। सरकारले औद्योगिक क्षेत्रको पूर्वाधार विकास र सञ्चालनको लागि ३३ करोड रुपैयाँ विनियोजन गरेको छ।

आर्थिक वर्ष २०८०/८१ को बजेट सार्वजनिक गर्दै अर्थमन्त्री डा. प्रकाशशरण महतले औद्योगिक क्षेत्रको पूर्वाधार विकास र सञ्चालनको लागि ३३ करोड रुपैयाँ विनियोजन गरेको घोषणा गरेका हुन्।

सरकारबाट घोषणा भएका औद्योगिक क्षेत्र, विशेष आर्थिक क्षेत्र र औद्योगिक ग्रामको पूर्वाधार निर्माणलाई तीव्रता दिइने र नौवस्ता र मोतिपुर औद्योगिक क्षेत्रको निर्माण कार्य सुरु गरिने पनि सरकारले घोषणा गरेको छ।

त्यस्तै, चितवनको शक्तिखोर र मकवानपुरको मयुरधाप औद्योगिक क्षेत्रको वातावरणीय प्रभाव मूल्याङ्कन, रुख कटानलगायतका पूर्व तयारीका कार्य सम्पन्न गरी सार्वजनिक निजी साझेदारीमा विकास तथा सञ्चालन गर्न निजी क्षेत्रलाई प्रोत्साहन गरिनेछ। सञ्चालनमा रहेका १० वटा औद्योगिक क्षेत्रहरूको पूर्वाधार सुधार र स्तरोन्नति गरिने पनि बजेटमा घोषणा गरिएको छ।

सिमरा विशेष आर्थिक क्षेत्रको बाँकी काम सम्पन्न गरी सञ्चालनमा ल्याइनेछ। भैरहवा विशेष आर्थिक क्षेत्रलाई पूर्ण क्षमतामा सञ्चानलन गरिनेछ। पाँचखाल विशेष आर्थिक क्षेत्रको पूर्वाधार निर्माण कार्य सम्पन्न गरिने सरकारले उल्लेख गरेको छ। विशेष आर्थिक क्षेत्रमा पूर्वाधार निर्माणको लागि ५४ करोड विनियोजन गरेको अर्थमन्त्री डा. महतले घोषणा गरेका छन्।

प्रकाशित मिति: सोमबार, जेठ १५, २०८० १८:३५

प्रतिक्रिया दिनुहोस्