स्थानीयवासी र प्रहरीबीच झडप भएपछि रोकियो रथ यात्रा (तस्बिरहरू)

काठमाडौं– रातो मछिन्द्रनाथको रथ तान्ने क्रममा ललितपुरको पुल्चोकमा प्रहरी र स्थानीयवासीबीच झडप भएको छ।

निषेध आदेशमा जात्रा, पर्व नगर्न सरकारले गरेको आग्रहकै बीच स्थानीयवासीले रथ तान्न सुरु गरेपछि झडप भएको हो।

भीडलाई नियन्त्रणमा लिन प्रहरीले अश्रु ग्यास प्रहार गरेको छ। अहिले रथ तान्न भेला भएकाहरू तितरबितर भएका छन्।

स्थानीयवासीले प्रहरीको एउटा मोटरसाइकलमा आगजनीसमेत गरेका छन्।

कोरोना संक्रमणको जोखिम बढेका कारण काठमाडौं उपत्यकामा २४ भदौसम्म निषेध आदेश लगाइएको छ।

निषेध आदेशमा अत्यावश्यक काम बाहेक घर बाहिर निस्कन पाइँदैन। सरकारले पनि चाडपर्व, जात्रा घरभित्रै परिवारबीच मात्रै मनाउन आग्रह गर्दै आइरहेको छ।