बेसार प्रवर्द्धनमा जुट्यो इलामको रोङ गाउँपालिका

कृषि

गृहपृष्ठ
कृषि

बेसार प्रवर्द्धनमा जुट्यो इलामको रोङ गाउँपालिका

क्यापिटल नेपालबिहीबार, फागुन १०, २०८०

मंगलबारे। गुन्द्रुक, र सिस्नोको ‘ब्रान्डिङ’ र बजारीकरणमा सफलता मिलेपछि इलामको रोङ गाउँपालिकाले बेसार प्रवर्द्धधन सुरु गरेको छ। बाँदरलगायत जंगली जनावरबाट अन्नबाली जोगाउन समस्या भएपछि गाउँपालिका बेसार उत्पादन र प्रवर्द्धनमा लागेको हो।
यसका लागि गाउँपालिकाले पहिलो चरणमा बेसारको बीउ वितरण गरेको छ।

स्थानीय एक सहकारीमार्फत बेसारको बीउ वितरण सुरु गरिएको गाउँपालिकाका अध्यक्ष मणिकुमार स्याङ्बो (सुवास) ले जानकारी दिए। उनका अनुसार गाउँपालिकाभित्रै रहेको इको चिया उत्पादक सहकारीमार्फत ४५ जना किसानलाई अनुदानमा ८ सय ४० किलोग्राम बेसार उपलब्ध गराएको छ।

उत्पादन भएको बेसार सहकारीले नै खरिद गर्ने उनले बताए। प्रतिकिलोग्राम ४० रुपैयाँका दरले किसानबाट काँचो बेसार खरिद गर्ने योजना छ। सुरुमा ४५ जना किसानलाई दिइएको बीउबाट उत्पादन भएको बेसार अन्य किसानलाई समेत उपलब्ध गराइने छ र पर्याप्त उत्पादनपछि बाहिर निर्यात गर्न थालिने छ।

गाउँपालिकामा बेसारको राम्रो उत्पादन हुँदै आएको छ। बेसार १० गुना बढी फल्ने गरेको किसान बताउँछन्। एक किलोग्राम बेसारबाट १० किलोग्रामसम्म उत्पादन हुने गरेको किसानको भनाइ छ। रासस

प्रकाशित मिति: बिहीबार, फागुन १०, २०८० ०९:२१

प्रतिक्रिया दिनुहोस्