म त लागें है अमेरिका !

धनगढी– प्रधानमन्त्री केपी शर्मा ओलीका पछिल्ला कदम असंवैधानिक भएको भन्दै कैलाली सदरमुकाम धनगढीमा बयलगाडा र्‍याली निकालिएको छ। 

नेपाल कम्युनिष्ट पार्टी (नेकपा) दाहाल–नेपाल समूह निकट अनेरास्ववियू जिल्ला कमिटी कैलालीले बयलगाडा र्‍याली निकालेको हो। 

धनगढीको क्याम्पस चोकबाट निकालिएको बयलगाडासहितको र्‍याली पार्क चोकमा पुगेर कोण सभामा परिणत भएको छ ।

२०६२–०६३ सालको जनआन्दोलनताका ओलीले ‘गणतन्त्र आउनु भनेको बयलगाडा चढेर अमेरिका पुग्नुजस्तै हो’ भनेका थिए। सोही विषयमा व्यंग्य गर्न अनेरास्ववियूले बयलगाडा प्रदर्शन गरेको हो।

प्रधानमन्त्री ओलीले असंवैधानिक तरिकाबाट प्रतिनिधि सभा विघटन गरेको भन्दै सो कदम सच्याउन अनेरास्ववियूका नेता कार्यकर्ताले माग गरेका छन्।