बागमतीमा माओवादीले सरकारलाई दिएको समर्थन फिर्ता

काठमाडौं– नेकपा माओवादी (केन्द्र)ले बागमती प्रदेशमा सरकारलाई दिएको समर्थन फिर्ता लिने निर्णय गरेको छ। 

आज सोमबार काठमाडौंमा बसेको संसदीय दलको बैठकले वर्तमान प्रदेश सरकारलाई दिएको समर्थन फिर्ता लिँदै सशक्त प्रतिपक्षको भूमिका निर्वाह गर्ने निर्णय गरेको हो।

माओवादी केन्द्र र नेकपा एमालेको माधवकुमार नेपाल पक्षबाट मन्त्री बनेकाहरुले यसअघि नै पदबाट राजीनामा दिइसकेका छन्।

प्रदेश सरकारविरुद्ध यसअघि माओवादी र एमालेको माधवकुमार नेपाल पक्षले दर्ता गरेको अविश्वासको प्रस्ताव अघि बढ्ने अवस्था नरहेका कारण सरकारलाई दिएको समर्थन फिर्ता लिने निर्णय गरिएको माओवादीले जनाएको छ। बागमती प्रदेश सभामा माओवादीका २३ जना सांसद छन्। 

माओवादीले समर्थन फिर्ता लिए पनि बागमती सरकारलाई कुनै अप्ठ्यारो पर्नेछैन। प्रदेशसभामा एमालेको बहुमत छ। ११० सांसदमध्ये ५७ जना एमालेका छन्।

मुख्यमन्त्री तथा एमाले संसदीय दलका नेता डोरमणि पौडेलले भोलि बुधबार संसदीय दलको बैठक बोलाएका छन्। बैठकमा उनले एमाले माधव नेपाल समूहका सांसदहरुलाई आफूविरुद्धको अविश्वास प्रस्ताव फिर्ता लिन निर्देशन दिने बताइएको छ।

एमालेकी अष्टलक्ष्मी शाक्यलगायत ४५ जना सांसदहरुको हस्ताक्षरसहित गत पुस १० गते मुख्यमन्त्री पौडेलविरुद्ध प्रदेशसभामा अविश्वासको प्रस्ताव पेश भएको थियो।