लिगलिडर एथ्लेटिको मड्रिड सेभियासँग पराजित

काठमाडौं - स्पेनिस ला लिगाको लिगलिडर एथ्लेटिको मड्रिड सेभियासँग पराजित भएको छ। 

सेभियाको मैदानमा आइतबार राति सम्पन्न खेलमा एथ्लेटिकोले १–० गोलको हार बेहोरेको हो।

निकै प्रतिस्पर्धात्मक खेलको पहिलो हाफ बराबरीमा रोकिए पनि दोस्रो हाफको ७० औं मिनेटमा मार्कोस एकुनाले खेलको निर्णायक गोल गर्दै घरेलु टिमलाई जित दिलाएका थिए।

यो जितसँगै सेभियाले चौथो स्थानमा अंक दूरी बढाएको छ। उसले पाँचौ स्थानको रियल बेटिसभन्दा १२ अंक को अग्रता बनाएको हो।

यता उपाधि दाबेदार एथ्लेटिको आफ्ना यात्रामा कमजोर सावित भएको छ। उसले शीर्षस्थानमा अंक दूरी बढाउने अवसर गुमाएको छ। जसको प्रत्यक्ष फाइदा रियल मड्रिड र बार्सिलोनालाई पुग्नेछ।

एक खेल हातमै भएको बार्सिलोनाको अहिले ६२ अंक छ जुन एथ्लेटिकोको भन्दा चार अंक कम हो।

त्यस्तै, रियलको एथ्लेटिकोको भन्दा मात्र तीन अंक कम छ।