ओलीलाई दाहालको प्रश्न– यही संसद्सँग विश्वासको मत माग्ने नैतिक अधिकार छ तपाईंलाई ?

काठमाडौं- नेकपा माओवादी केन्द्रका अध्यक्ष पुष्पकमल दाहालले प्रधानमन्त्री केपी शर्मा ओलीलाई यही संसदबाट विश्वासको मत लिने अधिकार नभएको बताएका छन्।

ओलीले यही संसदको आवश्यकता छैन भनेर भंग गरेको स्मरण गर्दै दाहालले आफ्नो मन्तव्यमा भने, ‘प्रधानमन्त्री ज्यू तपाइँलाई यही संसदबाट विश्वासको मत माग्ने नैतिक अधिकार छ र ?’

दाहालले ओलीले संसद मरिसक्यो भने पनि संवैधानिक रुपमा बाँचिरहेको छ भन्दै आफूले आश्वासन दिएको स्मरण गरे।

उनले भने, ‘प्रधानमन्त्री ज्यूले आफ्नो अहंकारले, गलत प्रवृत्तिले संसद मर्यो सांसदहरु मरिसकेक भन्नु भएको थियो, तर मैले ओली जीले मारे पनि संवैधानिक रुपमा मरेको छैन भनेका थिएँ।’

दाहालले ओलीले अब फेरि संसद विघटनका लागि विश्वासको मत लिने प्रपन्च रचेका हुन् कि भन्ने आशंका आम रुपमा उठिरहेको बताए।