भुटानी शरणार्थी प्रकरणः बादलका छोरा प्रतीकको मुद्दामा कैफियत प्रतिवेदन मगाउने सर्वोच्चको आदेश

समाज

गृहपृष्ठ
समाज

भुटानी शरणार्थी प्रकरणः बादलका छोरा प्रतीकको मुद्दामा कैफियत प्रतिवेदन मगाउने सर्वोच्चको आदेश

क्यापिटल नेपालसोमबार, पुस २२, २०८१

काठमाडौं। सर्वोच्च अदालतले नक्कली भुटानी शरणार्थीसम्बन्धी मुद्दाका आरोपित प्रतीक थापाबारे कैफियत प्रतिवेदन मगाउने आदेश गरेको छ। न्यायाधीश सपना प्रधान मल्लको एकल इजलासले पूर्वगृहमन्त्री रामबहादुर थापा ‘बादल’का छोरा प्रतीकको मुद्दामा कैफियत प्रतिवेदन मगाउने आदेश दिएको हो।

उक्त प्रकरणमा उच्च अदालत पाटन र जिल्ला अदालत काठमाडौंले पुर्पक्षका लागि थुनामा पठाउने आदेश गरेकामा थापाले त्यसविरुद्ध सर्वोच्च अदालतमा आज निवेदन दर्ता गराएका थिए। सर्वोच्च अदालतका प्रवक्ता अच्युत कुँइकेलका अनुसार सोही निवेदनमाथिको सुनुवाइपछि थप कागजात मगाउने आदेश गरिएको जानकारी दिए।

यसअघि गत असार १४ गते थापालाई सो प्रकरणमा प्रहरीले पक्राउ गरेको थियो। जिल्ला अदालत काठमाडौंले थापालाई पुर्पक्षका लागि थुनामा पठाउने आदेश गरेपछि सो निर्णयविरुद्ध उच्च अदालत पाटनमा मुद्दा दायर गरेका थिए।