१२ लाखमा पुग्यो बेनीका घरघरमा खानेपानी

समाज

गृहपृष्ठ
समाज

१२ लाखमा पुग्यो बेनीका घरघरमा खानेपानी

क्यापिटल नेपालबुधबार, फागुन ७, २०८१

काठमाडौं। म्याग्दीको बेनी नगरपालिका–४ सिंगाको सिस्नेरा र बाजगरा टोलमा ‘एक घर, एक धारा’ सहितको खानेपानी आयोजना निर्माण भएको छ। बेनी नगरपालिकाको अनुदान र उपभोक्ताहरुको श्रमदानमार्फत १२ लाखको लागतमा छ्यारछ्यारे खानेपानी आयोजना निर्माण भएको हो।

सो आयोजना मार्फत ३० घरपरिवार लाभान्वित भएको उपभोक्ता समितिका अध्यक्ष देवेन्द्र चोखालले जानकारी दिए। वडा कार्यालयको सिफारिसमा बेनी नगरपालिकाले चालु आर्थिक वर्ष २०८१/०८२ मा विनियोजन गरेको आठ लाख बजेट र चार लाख बराबरको श्रमदानमा योजना निर्माण भएको उनले बताए।

'छ्यारछ्यारेमा मुहान, पाइपलाइन, टंकी र २२ वटा नयाँ धारा निर्माण गरिएको छ भने आठ वटा पुराना धारालाई मर्मत गरेर खानेपानी वितरणको व्यवस्था मिलाएका छौ',उनले भने, 'घरघरमा मिटर सहितको धाराबाट खानेपानी वितरण भएपछि समयको बचतका साथै पानीका कारणले हुने सामाजिक दन्द्ध न्युनीकरण भई सद्भाव कायम गर्न सहयोग पुगेको छ।'

खानेपानी योजना निर्माणका लागि कुल लागतको दश प्रतिशत श्रमदान गर्नुपर्ने नगरपालिकाको नीति भएपनि प्रतिघर २७ दिनका दरले चार लाख बराबरको श्रमदान भएको उपभोक्ता समितिका सचिव लालबहादुर कार्कीले जानकारी दिए। यसअघि २०६५ मा निर्माण भएको योजनाको सार्वजनिक धारा पुरानो भएकाले पानी वितरण गर्न असहज भएपछि नयाँ निर्माण गरिएको उनले बताए।

प्रकाशित मिति: बुधबार, फागुन ७, २०८१ १२:२६

प्रतिक्रिया दिनुहोस्