दुबईबाट फर्किने यात्रुलाई ल्यापटप ल्याउन लगाएर न्युरोडमा बिक्री, व्यापारीसहित ७ जना पक्राउ

समाज

गृहपृष्ठ
समाज

दुबईबाट फर्किने यात्रुलाई ल्यापटप ल्याउन लगाएर न्युरोडमा बिक्री, व्यापारीसहित ७ जना पक्राउ

क्यापिटल नेपालमंगलबार, चैत १९, २०८१

काठमाडौं। दुबईबाट फर्किने यात्रुलाई ल्यापटप ल्याउन लगाएर भन्सार छली गरेको आरोपमा न्युरोडका एक व्यापारीसहित ७ जनालाई प्रहरीले पक्राउ गरेको छ। उपत्यका अपराध अनुसन्धान कार्यालयले भन्सारछली चोरी तस्करी भइरहेको भन्ने सूचनाका आधारमा उनीहरुलाई पक्राउ गरेको हो।

पक्राउ पर्नेमा एलिटेड सप्लायर्स प्रालिका सञ्चालक मोरङको विराटनगर महानगरपालिका १५ घर भई हाल कंलकी बस्ने ३० वर्षका रसिद आलम, मकवानपुर राक्सीराङ गाउँपालिका ९ घर भई हाल सितापाइला बस्ने २६ वर्षका चित्रबहादुर मल्ल ठकुरी, सोही ठाउँका २४ वर्षका हुकुमबहादुर मल्ल र उदयपुरको कटारी नगरपालिका-५ घर भई हाल बौद्ध बस्ने ३१ वर्षका सुमीत केसी छन्।

यसैगरी, दुबईबाट ल्यापटप लिएर आउने महोत्तरी बलवा नगरपालिका १२ का २८ वर्षका राकेश गिरी, पाल्पा रम्भा गाउँपालिका १ का ४१ वर्षका तारा बहादुर रेस्मी मगर र पाँचथरको मिक्लाजुङ गाउपालिका ३ की ३५ वर्षकी कमला फियाकलाई पनि प्रहरीले पक्राउ गरेको छ।

प्रहरीका अनुसार आलमको एलिटेड सप्लायर्सबाट भन्सारछली गरेर ल्याएका डेल कम्पनीका ७२ थान ल्यापटप समेत बरामद गरिएको छ। भन्सार छल्नका लागि व्यापारीले दुबईबाट आउने यात्रुलाई एउटा ल्यापटप र एउटा मोबाइल ल्याउन लगाएर बिक्री गर्ने गरेको प्रहरीको अनुसन्धानबाट खुलेको छ। यसरी विदेशबाट आउनेलाई एउटा नयाँ ल्यापटप र एउटा मोबाइल ल्याउँदा सरकारले भन्सार छुट दिएको छ।

बरामद भएका सामानसहित पक्राउ परेका ७ जनालाई थप अनुसन्धान र कारबाहीको लागि त्रिभुवन विमानस्थल भन्सार कार्यालय पठाएको प्रहरीले जनाएको छ।

प्रकाशित मिति: मंगलबार, चैत १९, २०८१ २१:२२

प्रतिक्रिया दिनुहोस्