काठमाडौं। बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक)को छैटौं शिखर सम्मेलनमा सहभागी हुन चैत १९ देखि थाइल्यान्ड भ्रमणमा रहेका प्रधानमन्त्री केपी शर्मा ओलीले त्यहाँका उद्योगी व्यवसायीसँग छलफल गरेका छन्।
भ्रमणदलमा रहेका नेपालका उद्योगी, व्यवसायीलाई सहभागी गराएर प्रधानमन्त्री ओलीले आज थाई व्यवसायीलाई नेपालमा लगानी गरेर प्रतिफल लिन आग्रह गरेको उनको सचिवालयले जानकारी दिएको हो।
दुई देशबीचको सम्बन्ध सौहार्दपूर्ण रहेकाले थाई उद्यमीलाई नेपालमा लगानी गरेर लाग लिन सक्ने प्रधानमन्त्री ओलीको भनाइ थियो। लगानी सुरक्षाका लागि सरकारले ऐन–कानुनमा रहेका बाधा–व्यवधान हटाएको र त्यसअनुरुप कानुन संशोधन गरेकाले नेपालमा अहिले लगानी वातावरण बनेको प्रधानमन्त्री ओलीले थाई उद्यमीलाई जानकारी गराए।
‘पछिल्लो दशकमा थाइल्यान्डले विकास गरेको प्रविधि, हासिल गरेको समृद्धि र गरिबी निवारणमा अख्तियार गरेका नीतिका कारण अहिले समृद्ध मुलुकमध्येमा परेको छ। थाइल्यान्डले सिकेका ज्ञान, सीप र हासिल गरेका नवीनतम प्रविधिसँगै लगानी भित्र्याउन नेपालले पनि छिट्टै समृद्धि हासिल गन सक्छ’, प्रधानमन्त्री ओलीले भने।
छलफलमा थाई उद्यमी, व्यवसायीले नेपालको शिक्षा, स्वास्थ्य, प्रविधिका विषयमा लगानी गर्न इच्छुक रहेको बताएको उद्योग वाणिज्य महासंघ अध्यक्ष चन्द्रप्रसाद ढकालले जानकारी दिए। थाइल्यान्डका व्यवसायीले नेपालमा लगानीका लागि कृषि र प्रविधिका विषयमा बढी जोड दिएको उनको भनाइ छ।
‘नेपाली उद्यमीका छाता संगठनको निरन्तर प्रयास र पछिल्लो समय सरकारले लगानीका लागि कानुन संशोधन गरी बनाएको अनुकूल वातावरण प्रभावले धेरै लगानीकर्ता आकर्षित हुन सक्ने अवस्था छ। यसका लागि प्रधानमन्त्रीले थाई उद्यमीलाई नेपालमा लगानीका लागि आग्रह गर्नुभएको छ। उनीहरुको रेस्पोन्स राम्रो रह्यो’, अध्यक्ष ढकालले भने।
भेटमा प्रधानमन्त्रीको भ्रमणदलमा संलग्न नेपाली उद्यमी व्यवसायी प्रतिनिधिमण्डलका सदस्य पनि सहभागी थिए।
यसअघि बुधबार नेपाल र थाइल्यान्डबीच आठ समझदारीपत्रमा हस्ताक्षर भएका थिए। प्रधानमन्त्री ओली र थाई समकक्षी पे थोङ थान सिनावाताले द्विपक्षीय भेटवार्ता गरेका थिए।
वार्तामा राजनीतिक तथा द्विपक्षीय सम्बन्ध, व्यापार तथा आर्थिक सहकार्य, उड्डयन, पर्यटन तथा संस्कृति, विकास सहकार्य, तथा क्षेत्रीय र बहुपक्षीय मुद्दाका सम्बन्धमा छलफल भएको परराष्ट्र मन्त्रालयले जनाएको छ।
