काठमाडौं। होटेल सारथी प्रा.लि. र सिटिजन्स क्यापिटल लिमिटेडबीच आईपीओ जारी गर्ने उद्देश्यले नियामकको स्वीकृति लिने प्रक्रिया थालनी गर्नको लागि जारी तथा निर्गमन प्रबन्धक नियुक्तिसम्बन्धी सम्झौता पत्रमा हस्ताक्षर भएको छ।
होटेल सारथी, धुलिखेलमा आयोजित एक विशेष समारोहमा होटेलका कार्यकारी अध्यक्ष प्रल्हादप्रसाद प्याकुरेल र क्यापिटलका प्रमुख कार्यकारी अधिकृत सविर बादे श्रेष्ठले सम्झौता पत्रमा हस्ताक्षर गरे। हस्ताक्षर समारोहमा होटेलका सञ्चालक, महाप्रबन्धक, विभागीय प्रमुख र अन्य कर्मचारी पनि उपस्थित थिए। सोही समारोहमा क्यापिटलको मर्चेन्ट बैंकिङ्ग प्रमुख समीक्षा नेपाल पनि उपस्थित थिए।
होटेल सारथी निकट भविष्यमा पब्लिक कम्पनीमा रुपान्तरण भएर जारी पुँजीको ३० प्रतिशतले हुन आउने १५ करोड रुपैयाँ बराबरको १५ लाख कित्ता साधारण शेयर जारी गर्ने छ। आईपीओ जारीपश्चात कम्पनीको चुक्ता पुँजी ५० करोड रुपैयाँ पुग्ने छ।
क्यापिटलले होटेल सारथीलाई प्रा.लि.बाट पब्लिकमा रुपान्तरण गर्नसमेत सघाउने छ। सम्झौतासँगै होटेल सारथी आर्थिक वर्ष २०८२/०८३ भित्र नेपालका पुँजी बजारमा सूचीकृत हुने छ। यसबाट नयाँ लगानीकर्ताले होटेल तथा पर्यटन क्षेत्रको कम्पनीमा लगानीका लागि नयाँ अवसर पाउने छन्।
२०७२ सालमा स्थापना भएको होटेल सारथी धुलिखेल ८, रिसोर्ट मार्ग, काभ्रेपलाञ्चोकमा रहेको तीनतारे होटेल हो। निकट भविष्यमै चार तारेमा स्तरवृद्धि हुन लागेको छ। एउटा प्रेसिडेन्सियल, ६ वटा सुइट, ५० वटा प्रिमियम डिलक्स, २३ वटा डिलक्स गरि ८० वटा कोठा सञ्चालनमा रहेका छन्।
२० जनादेखि ४०० जनासम्मको क्षमता भएको ठूला-साना गरी ४ वटा सभा हल रहेको छ। होटेल भवनको सातौँ तल्लामा ‘रुफटप इन्फिनिटी स्वीमिङ पुल विथ पुल बार’ रहेको छ। यहाँबाट लाङटाङ हिमशृङ्खला र गौरीशंकर हिमालको मनोरम दृश्य अवलोकन गर्न सकिन्छ िजाडोमा स्वीमिङ पुलको पानीलाई तताउने प्रबन्धसमेत मिलाइएको छ। स्पा र फिटनेस सेन्टरसमेत संचालनमा ल्याएको छ।
होटेललाई विवाह मण्डपको रुपमा विकास गर्दै सारथीले गौरवमय उपस्थिति जनाइसकेको छ। भारतीय र मुलुककै विभिन्न शहरका नागरिकले होटललाई विवाहका लागि गन्तव्य बनाएका छन्। आगामी दिनमा होटेल सारथी विवाहको लागि उत्कृष्ट स्थल बन्ने प्रचुरता देखिएको छ। अन्तर्राष्ट्रिय सभा सम्मेलन गोष्ठीका लागि पनि होटेल सारथी अग्रिम बुकिङ्ग थलो बनेको छ।
होटेलले सारथीले शुरुआतदेखि नै पर्यावरणलाई ध्यानमा राख्दै फोहोर पानीको पुन: उपयोगलाई कार्यान्वयन गर्दै आएको छ। होटलबाट निष्कासित फोहोर पानीलाई होटल परिसरमै रहेको सिवरेज ट्रिटमेन्ट (एसटी) प्लान्टमार्फत ३३ हजार लिटर क्षमताको ट्यांकमा प्रशोधन गर्ने गरेको छ। प्रशोधित पानी होटलकै स्वामित्वमा रहेको जग्गामा अर्गानिक खेतीमा उपयोग हुँदै आएको छ।
होटलले उपलब्ध गराउने मेनुमा स्थानीयरूपमा उपलब्ध खाद्य सामग्रीलाई प्राथमिकता दिँदै आएको छ। हाल होटलमा प्रत्यक्ष रुपमा रोजगारी पाएका ७३ जनामध्ये ९० प्रतिशतभन्दा बढी स्थानीय छन्। स्थानीय स्तरमै रोजगारी, सीप विकास र पेशागत क्षमता वृद्धिसमेत सारथीले योगदान गरेको छ।
सारथी समूहअन्तर्गत होटेल सारथी प्रा.लि., सारथी मार्ट प्रा.लि., सारथी बहुउद्देश्यीय सहकारी संस्था लिमिटेड, सारथी वेलफेयर फाउण्डेशन, हिमालय इन्टरनेसनल एकेडेमी, धुलिखेल तालिम सेवा केन्द्र प्रा.लि., सारथी भेन्चर्स प्रा.लि., सारथी एडभेन्चर्स प्रा।लि र सारथी होलिडेज रहेका छन्। जिल्लाबाहिर उपस्थित जनाउँदै सारथी समूहको सारथी भेन्चर्स प्रा.लि.ले चितवनको सौराहास्थित बद्रेनी जङ्गल रिसोर्ट प्रा।लि। को ६५ प्रतिशत शेयर लिएको छ।
रिसोर्टको सम्पूर्ण व्यवस्थापन होटेल सारथीले गरिरहेको छ। उक्त रिसोर्ट २०२५ जनवरीदेखि सारथी समूहले लिएको हो। होटेल १९ रोपनी क्षेत्रफलमा फैलिएको छ। खाली रहेको जग्गा तथा भाडामा लिएको जग्गामा फार्म हाउस, रोप साइक्लिङ्ग, स्पोर्टस सेन्टर, पिकनिक स्थल र हेलिप्याड निर्माणाधीन अवस्थामा छ।
-1744437772.jpg)
