अल्मुताइरी राजीनामा प्रकरण : नेम्वाङ भन्छन्, 'षड्यन्त्र भयो, दोषी देखिए कारबाही भोग्छु’

काठमाडौं- अखिल नेपाल फुटबल संघ (एन्फा) का वरिष्ठ उपाध्यक्ष पंकज विक्रम नेम्वाङले मुख्य प्रशिक्षक अब्दुल्लाह अल्मुताइरीको राजीनामा प्रकरणमा आफ्नो दोष नरहेको बताएका छन्। आल्मुताइरीले आइतबार नेम्बाङले तीन सातादेखि नाटक गरिरहेको भन्दै राजीनामा घोषणा गरेका थिए। 

आल्मुताइरीले आफूमाथि आरोप लगाएको भन्दै उनले दोषी देखिए कारबाही भोग्न तयार रहेको बताए। उनले आफूमाथि आश्चर्यजनकरुपमा षड्यन्त्र गरिएको बताए। 

‘आश्चर्यजनकरुपमा यो कुरा किन आयो? मलाई विश्वास छ एन्फाले यस विषयमा छानबिन समिति गठन गर्छ। दोषी देखिए राजिनामा दिन तयार छु। निराधाररुपमा षड्यन्त्रपूर्वक हेड कोचको विज्ञप्ति आएको छ,’ उनले भनेका छन्, ‘सबै फुटबल प्रेमीले बुझिदिनुस्। राम्रो र सत्यका पक्षमा वकालत गर्दै आएको व्यक्ति हो। यो ममाथिको षयन्त्र हो।’ 

उनले एन्फाले उच्चस्तरीय छानबिन समिति गठन गरेर सत्यतथ्य बाहिर ल्याउनुपर्ने बताएका छन्। ‘छानबिन समिति गठन गर्ने विषयमा अध्यक्षज्यूलाई भनेको छु। अहिले अध्यक्षले हेडकोचसँग कुरा गरिरहनुभएको छ।’ 

उनले आफ्नो अल्मुताइरीसँग हाइ-हेलोसमेत नभएको बताएका छन्। ‘उहाँसँग मेरो हाइ-हेलो समेत भएको छैन। उनले मलाई चिन्दैनन् पनि होला। गएको तीन हप्तामा मैले के चाहिँ गरेँ र?,’ उनले भनेका छन्, ‘उहाँले ममाथि लगाएको आरोप  पुष्टि गर्नुपर्छ। हेड कोचको राजीनामा फेसबुकमा आउनु राम्रो होइन। यो व्यवसायिकता होइन।’