एमाले असन्तुष्ट पक्षका स्थायी कमिटी सदस्यको बैठक आज पनि बस्दै

काठमाडौं- नेकपा एमालेको असन्तुष्ट असन्तुष्ट पक्षका स्थायी कमिटी सदस्यहरुको बैठक आज पनि बस्ने भएको छ। वरिष्ठ नेता झलनाथ खनाल र माधवकुमार नेपाल समूहको स्थायी कमिटीका सदस्यहरू आज पनि छलफल गर्ने भएका हुन्। 

आइतबारदेखि यो समूहका नेताहरूको बैठक सुरु भएको हो। बिहान ११ बजे बुद्धनगरमा बस्ने आजको बैठक पार्टी एकताका विषयमा नै केन्द्रित हुने एमाले उपाध्यक्ष युवराज ज्ञवालिले जानकारी दिए। आइतबारको छलफलमा नेताहरूले अहिलेको स्थितिमा पार्टी एकता गरेर जानू विकल्प नरहेको बताएका थिए। 

बैठकमा कार्यदलले सहमति गरेको १० बुँदे प्रस्तावकै सेरोफेरोमा रहेर छलफल सुरु गरिएको छ। आइतबार एमाले एकताका लागि भन्दै दुवै तर्फका सासदहरूले विघटित कार्यदलका सदस्यहरूसित छलफल गरेका थिए। सासदहरूले पनि आफुहरुको अभियानलाई निरन्तरता दिने बताएका छन्। 

एमाले एकताका लागि अध्यक्ष केपी शर्मा ओली र वरिष्ठ नेता माधवकुमार नेपाल बसेर छलफल गर्नुपर्ने दबाब बढे पनि दुई जनाको भेटवार्ता हुन सकेको छैन। एक सातादेखि दोस्रो तहका नेताहरू प्रयासरत रहे पनि भेट हुन सकेको छैन। बरु दुवै नेताले एक अर्काविरुद्ध  सार्वजनिक रूपमा नै टीका टिप्पणी गर्दै आएका छन्।