पूर्वी नवलपरासीको पहाडी भेगमा जोखिमपूर्ण यात्रा [फोटोफिचर]

नवलपुर-  पूर्वी नवलपरासिको पहाडी भेगमा दशैका लागि घर फर्किने यात्रुहरूले जोखिमपूर्ण यात्रा गर्न बाध्य छन्।

सडक निर्माण भएको तीन दशकसम्म पनि सडक सुधार हुन सकेको छैन। दशैलाई लक्षित गरी वर्षातका कारण क्षतविक्षत भएको सडक मर्मत गरी सञ्चालन गरिएको छ । तर, दलदलेदेखि बुलिङटार र डेढगाउँसम्म जाने यात्रुले जोखिमपूर्ण यात्रा गर्न बाध्य छन्।

पहिरोले त्यसै जोखिमपूर्ण रहेको सडकमा दशै मान्ने यात्रुहरू जिपको छत छतमा बसेर यात्रा गर्न बाध्य छन्।

अमेरिकाका गेरी सेफदले पहाडी भेगका जनताले पैदल हिँड्न नपरोस् भन्ने उद्देश्यले २०४८ सालमा दलदलेदेखि अर्खलासम्म कच्ची सडकको योजना अघि सारेका थिए। अर्खलासम्म २०५५ सालमा पहिलोपटक गाडी पुग्दा जनता धेरै खुसी थिए। अर्खलासम्म गाडी पुगेपछि बुलिङटार, डाँडाझेरी, कोटरथर, भारतीपुर डेढगाउँसहित तनहुँका दक्षिणी भेगका जनतासमेत हर्षित भएका थिए।  त्यसपछि २०६० सालमा बुलिङटारसम्म गाडी पुगेको हो ।

४२ किलोमिटर दलदले बुलिङटार सडकखण्ड बनेको तीन दशकसम्म  पनि सडकको मुहार फेरिन नसकेको बुललिङटारका स्थानीय प्रकाश गिरी बताउँछन्।  लाखौं जनताको भविष्य जोडिएको सडक सुधार नहुँदा जोखिमपूर्ण यात्रा गर्नुपरेको उनले सुनाए।