हैजा नियन्त्रणमा नआएपछि कपिलवस्तुमा 'स्यानकोल' खुवाइँदै

बुटवल– औषधीले झाडापखला नियन्त्रणमा आउन नसकेपछि कपिलवस्तुका ५ स्थानीय तहमा हैजाविरुद्ध खुवाइने भएको छ।

असोज १८ गतेदेखि फैलिएको हैजा नियन्त्रणमा नआएपछि मंसिर ५ गतेदेखि साढे २ लाख जनसंख्यालाई हैजाविरुद्धको ‘स्यानकोल’ खुवाइने भएको हो। लुम्बिनी प्रदेश सरकारले अमेरिकाबाट आएको उक्त खोप निःशुल्क खुवाउने जनाएको छ। 

स्वास्थ्य तथा जनसंख्या मन्त्रालयले बिहीबार पत्रकार सम्मेलन गरी विश्व स्वास्थ्य संगठन (डब्लुएचओ) बाट प्राप्त खोप मंसिर ५ गतेबाट खुवाइने जनाएको छ। मंसिर ५ गते यशोधरा गाउँपालिकाबाट खुवाउन शुरू गर्ने लुम्बिनी प्रदेश स्वास्थ्य तथा जनसंख्या मन्त्रालयका सचिव डा. विकास देवकोटाले जानकारी दिए।

हैजा प्रभावित क्षेत्र कृष्णनगर नगरपालिका, शिवराज नगरपालिका, महाराजगन्ज नगरपालिका, विजयनगर गाउँपालिका र यशोधरा गाउँपालिकामा दुई चरणमा खोप खुवाइने उनले बताए। एक वर्षदेखि माथि उमेर समूहकालाई १४ दिनको फरकमा दुई पटक खोप खुवाइने वरिष्ठ स्वास्थ्य तथा शिक्षा अधिकृत शैलेन्द्रकुमार पाण्डेले बताए। चार पालिकामा भने मंसिर ७ गतेदेखि खोप अभियान सन्चालन गरिने मन्त्रालयले जनाएको छ। 

एक वर्षमुनिका बालबालिका, पखाला लागेका र ज्वरो आएको अवस्थामा भने खोप खान नमिल्ने पाण्डेले बताए। दुवै मात्रा खोप खाएको ७ दिनपछि यसले कम्तीमा पाँच वर्षसम्म सुरक्षा प्रदान गर्ने पाण्डेले बताए। मन्त्रालयले स्थानीय तहमा खोपको कोटा छुट्याएको छ। 

मन्त्रालयका अनुसार महाराजगन्ज नगरपालिकामा ५३ हजार एक सय ५६, कृष्णनगर नगरपालिकामा ६० हजार सात सय ४३, शिवराज नगरपालिकामा ६४ हजार सात सय ७८,  विजयनगर गाउँपालिकामा ३५ हजार ९ सय ३ र यशोधरा गाउँपालिकामा ३७ हजार ७ सय ८३ डोज खोप वितरण गरिने छ। 

जिल्ला स्वास्थ्य कार्यालयको तथ्यांकअनुसार हालसम्म शिवराज अस्पताल बहादुरगन्जमा एक हजार तीन सय ७१ जना, बैदौली स्वास्थ्य चौकीमा ९० जना र शिवराज आधारभूत अस्पतालमा ६ जना उपचारको लागि भर्ना भएका थिए। हैजाका कारण कपिलबस्तुमा ६ जनाको मृत्यु भइसकेको छ।