बुटवलमा पुस ८ गतेदेखि औद्योगिक प्रदर्शनी हुने

बुटवल- कोरोना महामारीपछि मेला महोत्सव हुन नसकिरहेको बेला पुस ८ गतेदेखि २० गतेसम्म बुटवलमा चौथौ औद्योगिक प्रदर्शनी हुने भएको छ। उद्योग व्यापार संघ बुटवलको आयोजनामा बुटवल देविनगरमा मेला हुने भएको हो।

आयोजकले शनिबार पत्रकार सम्मेलन गरि मेलाको ६० प्रतिशत तयारी पूरा भएको जनाएको छ। 'स्वाधीन अर्थतन्त्रको लागि राष्ट्रिय औद्योगिकरण तथा व्यापार विविधिकरण’ मूल नाराका साथ हुने मेलामा ४ सय ५० स्टल रहनेछन्। हालसम्म करिब तीन सय स्टल दर्ता भइसकेको संघका अध्यक्ष गोबिन्दराज गैरेले बताए।

मेलामा एक लाख पुरस्कार राशीको डान्स आइडल, विद्यालय स्तरीय नृत्य प्रतियोगिता, मम्मी डान्स (आमा नृत्य प्रतियोगिता), हरेक दिन विभिन्न विधाका राष्ट्रिय  कलाकारको प्रस्तुति, फेशन शो,निशुल्क दन्त शिविर र रक्तदान लगायतका कार्यक्रम आकर्षणको रुपमा रहने आयोजकले जनाएका छन्।

मुलुकको अर्थतन्त्र आयातमुखी र ब्यापारमुखी रहेको सन्दर्भमा उद्योग ब्यापार संघ बुटवलले स्थापनाकालदेखि नै स्वाधीन र आत्मनिर्भर अर्थतन्त्रको पक्षमा वकालत र काम गर्दै आएको हुँदा औद्योगिक प्रदर्शनी तथा ब्यापार मेलाले स्वदेशी उद्योगका उत्पादनको बजार प्रबर्द्धन, विभिन्न खाले व्यवसाय र सेवाको बजार विस्तार तथा नयां पुस्तालाई उद्यमशील बनाउन उत्प्रेरणा दिन र अर्थतन्त्र चलायमान बनाउन पनि ठूलो भूमिका खेल्ने संघका संस्थापक अध्यक्ष खिमनारायण पराजुलीले बताए। 

मेलाले उद्योगी र उपभोक्तालाई एकैथलोमा जमघट गराई उद्योगहरुलाई उपभोक्तामैत्री बनाउन पुलको काम गर्ने तथा रुपन्देही र लुम्बिनी प्रदेशको पर्यटन प्रवद्र्धन र नेपाली कला संस्कृति संरक्षणमा पनि टेवा पु¥याउने संघका उद्योग उपाध्यक्ष विष्णु पाण्डेले बताए ।

मेलामा १५ वटा फरक फरक सेल्फी जोन, संख–घण्टसहितका पुजारी रहने गरी ११ थरि देवी देवताका मुर्ति पनि मेलामा रहने संघका महासचिव पदम जीसीले जानकारी दिए। मेलामा आउने  दर्शकलाई मास्क र स्यानिटाइजर प्रयोग अनिवार्य गरेर मात्र प्रवेश गर्न पाउने व्यवस्था मिलाइएको  प्रचार प्रसार उपसमिति संयोजक जनेश पन्थीले बताए।