जंगली जनावरको आक्रमणबाट सुर्खेतमा दुई जनाको मृत्यु

सुर्खेतमा- भेरीगंगा नगरपालिका-५ सुर्खेत गेरवानीका दुई जनाको जंगली जनावरको आक्रमणबाट मृत्यु भएको छ। 

प्रहरीका अनुसार मृत्यु हुनेमा गेरवानी निवासी ४८ वर्षीय रामबहादुर चन्द र ६७ वर्षीय कवि वली रहेका छन्।

बर्दिया राष्ट्रिय निकुञ्जनजिक रहेको बफर जोन (मध्यवर्ती क्षेत्र)को जंगलमा घाँस काट्न गएका वेला उनीहरूलाई जंगली जनावरले आक्रमण गरेको जिल्ला प्रहरी कार्यालय सुर्खेतले जनाएको छ।

उनीहरू आइतबार घरदेखि तीन–चार सय मिटर पूर्वतर्फ बर्दिया राष्ट्रिय निकुञ्जनजिक रहेको बफर एरियामा घाँस काट्न गएका थिए। सोही क्रममा जंगली जनावरले आक्रमण गरेको बताइएको छ।

उनीहरू अबेरसम्म नफर्किएपछि आफन्तले दिउँसो साढे चार बजेतिर अस्थायी प्रहरी पोस्ट बबईमा खबर गरेमा थिए। खोजतलास गर्दा दुवै मृत भेटिएको प्रहरीले जनाएको छ।