कावासोती– कांग्रेस केन्द्रीय सदस्य एवं नवलपुर क्षेत्र–१ का प्रतिनिधिसभा सदस्य उम्मेदवार शशांक कोइरालाले राजनीतिक स्थिरताका लागि बहुमत आवश्यक भएको बताएका छन्।
कांग्रेस सम्मिलित गठबन्धनले आगामी निर्वाचनमा बहुमत ल्याए स्थिरतासहित विकासको ग्यारेन्टी दिइने उनले बताएका हुन्।
नवलपुरको दलदलेमा पाँच दलीय गठबन्धनको अगुवा कार्यकर्ता प्रशिक्षणलाई सम्बोधन गर्दै कोइरालाले बहुमत प्राप्त भए स्थिरतासँगै विकास दिइने वाचा गरे।
‘संविधानको रक्षा, स्थिरता र विकासका लागि गठबन्धनका उम्मेदवारलाई जिताउनुको विकल्प छैन,’ उनले भने।
आफू चौथो पटक नवलपुरका जनताको प्रतिनिधित्व गर्न अगाडि बढेको बताएका उनले यसअघिका कार्यकाल संविधान निर्माण र कार्यान्वयनका काम खर्चिएको सुनाए।
‘जिल्लामा स–साना काम भएकै छन्। अबको कार्यकाल विकासका लागि हो,’ उनले भने। कोइराला केही दिनअघि बिरामी भएका थिए। उपचारपछि उनी पुनः निर्वाचन क्षेत्रमा सक्रिय छन्।
प्रकाशित: Nov 02, 2022| 13:14 बुधबार, कात्तिक १६, २०७९
