जाम्बियाको सडक छेउमा २७ शव फेला

लुसाका- जाम्बियाको राजधानी लुसाकादेखि उत्तरमा पर्ने ग्वेरेर्रे क्षेत्रको सडक छेउ २७ जनाको शव फेला परेको छ। ती शव इथियोपियाबाट आएका आप्रवासीको हुनसक्ने अनुमान गरिएको बीबीसीमा उल्लेख छ।

प्रहरी प्रवक्ता ड्यान्नी म्वालेले उनीहरू ट्रान्जिटमा निस्सासिएर मरेको हुनसक्ने बताएका छन्। एक व्यक्ति अझै श्वास फेर्न प्रयास गरिरहेको अवस्थामा भेटिएको र उनलाई स्थानीय अस्पतालमा लगिएको बताइएको छ। 

दक्षिण अफ्रिकातर्फ जान होर्न अफ अफ्रिकाबाट आउने अधिकांश आप्रवासीका लागि जाम्बिया ट्रान्जिट प्वाइन्ट हो। स्थानीय समय अनुसार आइतबार बिहान ६ बजे ग्वेरेर्रेमा शव फेला पारेको बताइएको छ। उनीहरूका साथ भेटिएका कागजातबाट तिनीहरू इथियोपियाली नागरिक हुनुपर्ने अनुमान गरिएको छ । 

शवलाई जाम्बिया युनिभर्सिटी टिचिङ हस्पिटलको मुर्दाघरमा लागिएको छ।