हिमपात भएसँगै जुम्लाका किसान हर्षित

जुम्ला- जुम्लामा हिमपात हुँदा किसान हर्षित भएका छन्। सोमबार रातिबाट हिउँ पर्न थालेपछि हिउँदे बाली लगाएर आकाशे पानीको पर्खाइमा रहेका किसान खुसी भएका हुन्। 

यसपालीको हिउँदको यो पहिलो हिमपात हो। तल्लो क्षेत्रमा चार इन्चजति हिउँ जमे पनि उच्च भेगमा भने भारी हिमपात भएको स्थानीयले बताएका छन्। 

सोमबार मध्यराति १२ बजेदेखि हिउँ पर्न थालेको स्थानीयले बताएका छन्। माघको महिना लाग्दा पनि हिउँ नपरेपछि खडेरी लाग्ने हो कि भन्ने चिन्तामा थिए किसान। तर जौ, गहुँ बाली लगाएका किसान भने यो हिउँले उत्साहित भएका छन्। 

साथै स्याउ र ओखरका विरुवा रोप्ने सिजन आएका कारण पनि हिउँले सहज हुने स्थानीयको भनाइ छ।