छुट्टाछुट्टै सवारी दुर्घटनामा ४ जनाको मृत्यु

काठमाडौं- काभ्रेको नमोबुद्ध नगरपालिका-७ २० किलोस्थित सडकमा  बा. २ ख ७३४२ नम्बरको बसको ठक्करबाट पैदलयात्री सोही ठाउँ बस्ने कृष्ण बहादुर अधिकारीकी छोरी ८ वर्षीया दिविसा अधिकारीको बिहीबार दिउँसो घटनास्थलमै मृत्यु भएको छ। बस र चालकलाई प्रहरीले नियन्त्रणमा लिएको छ। 

मोरङको सुन्दरहरैचा नगरपालिका-१० खोर्साने केराबारी सडक-खण्डमा को.३२ प ८४६१ नम्बरको मोटरसाइकल अनियन्त्रित भई बिहीबार दिउँसो दुर्घटना हुँदा मोटरसाइकल चालक केराबारी गाउँपालिका-६ बस्ने १४ वर्षीय जोसन लिम्बुको मृत्यु भएको छ। दुर्घटनामा गम्भीर घाइते भएका उनको स्थानीय सुकुना सामुदायिक अस्पताल हुँदै नोबेल अस्पताल विराटनगरमा थप उपचारको क्रममा मृत्यु भएको हो।  

झापाको शिवसताक्षी नगरपालिका-१ कमल खोला छेउस्थित सडकमा ना.६ ख ८८९५ नम्बरको ट्रकलाई ना.५ ख ८३११ नम्बरको ट्रकले शुक्रबार बिहान ठक्कर दिँदा हाल नाम, थर, वतन नखुलेका ना.५ ख ८३११ नम्बरको ट्रकका चालक र सहचालकको मृत्यु भएको छ।

दुर्घटनामा गम्भीर घाइते भएका उनीहरूको दमक अस्पतालमा उपचारको क्रममा मृत्यु भएको हो।  दुबै ट्रक र  ना.६ ख ८८९५ नम्बरको ट्रक चालकलाई प्रहरीले नियन्त्रणमा लिएको छ।  दुर्घटनाका सम्बन्धमा प्रहरीले आवश्यक अनुसन्धान गरिरहेको छ।