सहकारी बैंकले सेयर पुँजीवृद्धि गर्ने, ८ अर्ब पुर्याउने प्रस्ताव साधारणसभामा लगिँदै

मुख्य समाचार

गृहपृष्ठ
मुख्य समाचार

सहकारी बैंकले सेयर पुँजीवृद्धि गर्ने, ८ अर्ब पुर्याउने प्रस्ताव साधारणसभामा लगिँदै

क्यापिटल नेपालबिहीबार, पुस १५, २०७८

काठमाडौं । राष्ट्रिय सहकारी बैंकले सेयर पुँजीबृद्धि गरेर ८ अर्ब पुर्याउने भएको छ । आर्थिक वर्ष २०७७/०७८ को असार मसान्तसम्ममा बैंकको सेयर पुँजी २ अर्ब ८७ करोड रहेकोमा त्यसलाई बढाएर ८ अर्ब सेयर पुँजी बढाउने प्रस्ताव आगामी साधारणसभामा लैजान लागेको बैंकका अध्यक्ष केवी उप्रेतीले जानकारी दिए ।

बैंकको सेयर पुँजी वृद्धिको माग अत्यधिक रहेको र विनियममा ३ अर्ब रुपैयाँ मात्र कायम रहेको हुँदा बैंकले सेयर पुँजी बढाउन सकेको थिएन । केही समयदेखि बैंकको सेयर बन्द छ । बैंकको १८ औं एकाइ साधारणसभा पुस १६ गतेबाट सुरु भई ३० गते सम्पन्न हुने जनाएको छ ।

२०६१ साल साउन १९ गतेदेखि कारोबार सुरु गरेको बैंकमा १४ हजारभन्दा बढी सहकारी संघसस्थाहरुलाई आबद्ध गराई ६८ वटा शाखा कार्यालयहरु मार्फत सेवा प्रवाह गर्दै आएको छ । बैंकले आर्थिक वर्ष २०७७/७८ मा सेयरपुँजी २ अर्ब ८७ करोड र ६६ अर्ब ३४ करोड निक्षेप संकलन गरी ३५ अर्ब ९१ करोड कर्जा प्रवाह गर्दै कुल ७१ अर्ब ६८ करोड कारोकार गर्न सफल भएको उल्लेख छ ।

बैंकले सहकारी क्षेत्रमा पहिलोपटक नेपाल लेखामान मापदण्डअनुसार वार्षिक प्रतिवेदन तयार गरी सार्वजनिक गरेको छ । बैंकले साविकमा रहेको ४४ वटा शाखालाई ५४ प्रतिशतले वृद्धि गरी ६८ वटा शाखा पुर्याएको छ ।

आगामी आर्थिक वर्ष २०७८/७९ मा सेयर पुँजी ३ अर्ब ५० करोड, निक्षेप संकलन ७८ अर्ब १ करोड,कर्जा लगानी ४९ अर्बभन्दा बढी गरी ८६ अर्ब १७ करोडभन्दा बढीको कसल कारोबार गर्ने लक्ष्य लिएको सूचना अधिकारी राजेश श्रेष्ठले जानकारी दिए ।

प्रकाशित मिति: बिहीबार, पुस १५, २०७८ १२:५५

प्रतिक्रिया दिनुहोस्