बुटवलको सुन पसलमा भएको चोरीबारे महासंघको ध्यानाकर्षण, संलग्नकाे खोजी गरी कारबाही गर्न माग

मुख्य समाचार

गृहपृष्ठ
मुख्य समाचार

बुटवलको सुन पसलमा भएको चोरीबारे महासंघको ध्यानाकर्षण, संलग्नकाे खोजी गरी कारबाही गर्न माग

क्यापिटल नेपालबुधबार, वैशाख १४, २०७९

काठमाडौं । देश निर्वाचनको माहौलमा होमिएका बेला चोरी र लुटपाटका घटना बढ्न थालेकोमा नेपाल सुनचाँदी ब्यवसायी महासंघको ध्यानाकर्षण भएको छ ।

संघले वैशाख १२ गते बुटवल उपमहानगरपालिकाको मध्यबजार अमरपथ विपी चोकस्थित दिलवहादुर सुनारको कोटेश्वर गुल्मेली मजुवा सुनचाँदी पसलमा भएको चोरीलाई लिएर चासो व्यक्त गरेको छ ।

साथै संघले आगामी दिनमा यस किसिमका घटना दोहोरिन नदिन गृह प्रशासनसँग मागसमेत गरेको छ ।

उक्त दिन मजुवा सुनचाँदी पसल छेवैको गल्लीबीचको सटर भाडामा लिई फेन्सी पसल सञ्चालन गर्दै आएका व्यक्तिले सो पसलको ताला तोडी सुनचाँदीका गरगहना चोरी गरेको संघको विज्ञप्तिमा उल्लेख छ ।

उक्त पसलबाट ५ करोडबराबरको धनमाल चोरी भएको र निज फरार रहेको भन्दै संघले चोरीमा संलग्नको खोजी गरी कारबाहीसमेत गर्न महासंघले माग गरेको छ ।

‘सुनचाँदी व्यवसाय आफैंमा संवेदनशील व्यवसाय हो । यस क्षेत्रमा बारम्बार चोरी, डकैती र लुटपाटका घटना हुने गरेका छन्’, विज्ञप्तिमा भनिएको छ, ‘मुलुक नै निर्वाचनको माहौलमा होमिएका बेला चोरी र लुटपाटका घटनाहरु झनै बढ्न सक्ने भएकोले यसतर्फ थप सचेत हुन र शान्ति सुरक्षाको प्रत्याभूति दिलाउन सम्वद्ध निकायसँग महासंघ जोडदार माग गर्दछ ।’

प्रकाशित मिति: बुधबार, वैशाख १४, २०७९ १५:५१

प्रतिक्रिया दिनुहोस्