बागलुङ। नेपालको एकमात्र सिकार आरक्ष ढोरपाटनमा यस वर्षको दोस्रो सिकारयाम सकिएको छ। दोस्रो याममा ११ नाउर र सात झारलको मात्र सिकार भएको छ।
वन्यजन्तु तथा राष्ट्रिय निकुञ्ज विभागले गत माघ १५ मा सिकार गर्न बोलपत्र आह्वान गरी १३ नाउर, १० झारल र १२ बँदेल गरी ३५ वन्यजन्तुको सिकार अनुमति दिएको थियो।
सिकार खेल्न हिमालयन वाइल्डलाइफ आउटफिर्टस प्रालि, ट्रयाक्स एन्ड ट्रेल्स, हिमालयन सफारिज, ग्लोबल सफारिज नेपाल, नेपाल ट्राभल एक्सपिडिसन र ओपन नेपाल वाइल्डलाइफ सफारिज गरी ६ कम्पनीले अनुमति पाएका थिए।
वन्यजन्तु तथा राष्ट्रिय निकुञ्ज विभागबाट अनुमति पाएका सिकारी ढोरपाटन सिकार आरक्षको फागुने, सुनदह, घुस्तुङ, दोगाडीलगायत ब्लकमा पुगेका थिए।
ढोरपाटन सिकार आरक्ष कार्यालयका रेन्जर सागर सुवेदीका अनुसार चैत २६ देखि सिकारी ढोरपाटन आएका थिए । सिकारीले सुनदह ब्लकमा दुई नाउर र दुई झारल, घुस्तुङ ब्लकमा तीन नाउर र तीन झारल, दोगाडी ब्लकमा चार नाउर र एक झारल, फागुने ब्लकमा एक नाउर र एक झारल र बार्सेमा एक नाउरको सिकार थिए। १२ बँदेलको सिकार अनुमति दिए पनि एउटा पनि सिकार भएन।
दोस्रो याम (फागुन–वैशाख)का लागि वैशाख १६ सम्म सिकारीले सिकार खेलेका थिए।
सुवेदीका अनुसार हिमालयन वाइल्डलाइफ आउटफिर्टस काठमाडौंले सिकारीमार्फत दुई नाउर, दुई र दुई बँदेल सिकार गर्न अनुमति पाएको थियो। यो कम्पनीले एउटा नाउर र एउटा झारल मात्र सिकार गरेको छ।
ट्रयाक्स एन्ड ट्रेल्समार्फत अमेरिकन सिकारीले दुई नाउर र दुई झारल सिकार गर्ने अनुमति पाएकामा सबै वन्यजन्तुको सिकार गरेको उनले बताए।
त्यसैगरी हिमालयन सफारिज काठमाडौंमार्फत तीन सिकारीले तीन नाउर, एक झारलका लागि अनुमति पाएकामा तीन नाउर र एक झारल सिकार गरेका छन्। ग्लोबल सफारिज नेपालमार्फत दुई सिकारीले दुई नाउर, एक झारल र दुई बँदेलको सिकार गर्ने अनुमति पाएका थिए।
त्यसमध्ये दुई नाउर र एक झारलको सिकार गरेका छन्। नेपाल ट्राभल एक्सपिडिसन प्रालिमार्फत तीन सिकारीले तीन नाउर, तीन झरल र तीन बँदेल सिकार गर्ने अनुमति पाएकामा दुई नाउर मात्र सिकार गरेको सुवेदीले जानकारी दिए।
ओपन नेपाल वाइल्डलाइफ सफारिज एन्ड ट्रेक्स प्रालिमार्फत तीन सिकारीले एक नाउर, दुई झारल र तीन बँदेलको सिकार गर्न अनुमति पाएकामा एक नाउर र दुई झारलको सिकार गरेको उहाँले बताए।
दोस्रो सिकार आयममा अमेरिका, अर्जेन्टिना, स्पेनिस, फ्रान्सबाट सिकारी आएका थिए । ढोरपाटनमा हरेक वर्ष (असोज–मंसिर) पहिलो र (फागुन–वैशाख) दोस्रो याममा सिकार हुने गर्छ।-रासस
