'बैंकिङ क्षेत्रमा समस्या आए सहकारी पनि संकटमा पर्ने'

मुख्य समाचार

गृहपृष्ठ
मुख्य समाचार

'बैंकिङ क्षेत्रमा समस्या आए सहकारी पनि संकटमा पर्ने'

क्यापिटल नेपालबिहीबार, वैशाख ११, २०७७

काठमाडौं । कोरोनाको असरले बैंकिङ क्षेत्रमा समस्या आए सहकारी संस्थाहरू पनि प्रभावित हुने विज्ञहरूले बताएका छन् । सहकारी पत्रकार समाजले आयोजना गरेको भिडियो कन्फरेन्सनमा सहकारी विभागका रजिस्टार डा. टोकराज पाण्डेले सहकारी क्षेत्रले उत्पादनमूलक क्षेत्रमा लगानी नगरेको परिणाम भयावह हुनेसमेत बताए । उनले सहकारीले उत्पादन क्षेत्रमा लगानी नगरी वाणिज्य बैंकमा राख्दा बैंकमा समस्या आए सहकारीमा पनि समस्या आउने चेतावनी दिएका हुन् ।

रजिस्टार पाण्डेले आगामी दिनमा सहकारी क्षेत्रले पनि सहुलियतपूर्ण कर्जा दिने व्यवस्था गर्न आवश्यक रहेको बताए । उनले यो विषयमा अर्थ मन्त्रालयमा प्रस्ताव पनि पेस गरेको र सहुलियतपूर्ण कर्जाका साथै युवा स्वरोजगार कोषको पैसा नदिए सहकारीमा तरलताको चरम अभाव हुने बताए ।

उनले फरक प्रसंगमा प्रदेशका केही सहकारीहरूले फरक प्रकृतिको ऋणमा छुट दिन थालिसकेको जानकारी गराए । फरक प्रकृतिका कर्जाका ब्याजको विषयमा छलफल भइरहेको र निर्णयमा पुगिनसकेको उनको भनाइ छ ।

उनले सहकारी संस्थाहरूलाई समस्यालाई अवसरका रूपमा लिन आग्रह गरेका छन् । सहकारी आगामी दिनमा प्रविधिमैत्री हुन आवश्यक रहेको पनि रजिस्टार पाण्डेको भनाइ छ ।

सहकारी प्रविधिमैत्री बन्नुपर्ने

सहकारी बैंकका प्रमुख कार्यकारी अधिकृत (सिइओ) बद्री गुरागाईंले अबका दिनमा सबै सहकारी प्रविधिमैत्री बन्नुपर्ने बताए । उनले सहकारी बैंकले राष्ट्र बैंकले भनेजसरी नै चैतबाट ब्याजमा छुट दिन थालेको पनि जानकारी गराए ।
त्यस्तै, लकडाउन खुलेपछि सदस्यहरू आएर धमाधम बचत निकाल्न थालेको खण्डमा कस्तो अवस्था आउने हो, त्यसमा सबै अहिले नै सचेत हुनुपर्ने वेला आएको बताए ।

प्रकाशित मिति: बिहीबार, वैशाख ११, २०७७ ११:४५

प्रतिक्रिया दिनुहोस्