काठमाडौं। अटोमोबाइल क्षेत्रमा ख्याति कमाएका चीनका दुई ठूला कम्पनी डोङफेङ मोटर र चांगन अटोमोबाइल मर्जरमा जाने भएका छन्। सरकारी स्वामित्वका दुई कम्पनी चीनकै सबैभन्दा ठूलो अटो समूह बन्ने उद्देश्यसहित मर्जमा जान लागेका हुन्।
द न्युयोर्क टाइम्सका अनुसार यी दुई कम्पनीबीच मर्जरका लागि छलफल भइरहेको छ। डोङफेङ मोटर र चांगन अटोमोबाइलले आफ्ना स्वामित्वसहितको पुँजी कसरी संयोजन गर्ने भन्नेमा विस्तृत छलफल गरिरहेका हुन्। यी दुई कम्पनीले विदेशी साझेदारलाई मर्जरमा जानेबारे अवगत गराइसकेको अन्तर्राष्ट्रिय सञ्चार माध्यमले जनाएका छन्।
चोङकिङमा आधारित चांगन २० वर्ष बढी समयदेखि चिनियाँ अटो बजारमा फोर्डको प्रमुख साझेदारको रुपमा रहेको छ भने वुहानमा अवस्थित डोङफेङ निसान मोटरका लागि लामो समयदेखि साझेदार हो।
यी दुई कम्पनीको सम्झौताले कार र सैन्य सवारीसाधनको उत्पादन श्रेणीमा शक्तिशाली निर्माता सिर्जना गर्ने भए पनि अमेरिकी र जापानी साझेदारको लागि भने समस्या सिर्जना हुन सक्ने बताइन्छ।
डोङफेङ जनमुक्ति सेनालाई सैन्य सवारीसाधन आपूर्तिकर्ता हो भने चांगन चिनियाँ सैन्य ठेकेदारको सहायक कम्पनी हो। डोङफेङ र चांगनको सम्झौताले चिनियाँ अटो बजारको महत्त्वपूर्ण हिस्सालाई प्रतिनिधित्व गर्नेछ। यी दुई कम्पनी मर्जपछि चीनको नम्बर १ अटो निर्माता बन्नेछ।
यी दुईको संयुक्त कम्पनीले पेट्रोल कारका लागि अतिरिक्त कारखाना बन्द गर्न सक्षम हुने र विद्युतीय कारमा सफल हुने विश्वास लिइएको छ। चांगन र डोङफेङले मुख्यतया संयुक्त उद्यमका लागि पेट्रोल कार उत्पादन गर्छन्। आफ्नै ब्रान्डका लागि विद्युतीय कारमा बढी जोड दिँदै मर्जरमा जाने भएपछि अन्तर्राष्ट्रिय साझेदारलाई भने असर गर्न सक्नेछ।
डोङफेङ र चांगन चीनबाहिर थोरै मात्र परिचित भए पनि आन्तरिक रुपमा महत्त्वपूर्ण अटो निर्मातामध्येमा पर्छन्। प्रत्येक कम्पनीले आफ्नै ब्रान्डअन्तर्गत र अन्तर्राष्ट्रिय अटोमेकरसँग संयुक्त उद्यममार्फत ठूलो संख्यामा सवारीसाधन उत्पादन गर्दै आएका छन्।
संयुक्त रुपमा दुवै कार निर्माताले वार्षिक लगभग ५० लाख सवारीसाधन उत्पादन गर्दै आएको चिनियाँ तथ्यांक छ। यसले फोर्ड मोटरको विश्वव्यापी उत्पादनलाई उछिनेको छ भने फियाट, क्रिसलर एवं प्यूजोको मुख्य कम्पनी जनरल मोटर्स र स्टेलान्टिससँग प्रतिस्पर्धा गर्छ।
डोङफेङ र चांगन मर्जपछि नयाँ अटो समूहको वार्षिक बिक्री लगभग ४.५८ मिलियन युनिट हुने अनुमान गरिएको छ। यसले बीवाईडीलाई उछिनेर चीनको नम्बर १ कार निर्माता बन्नुका साथै विश्वको पाँचौं ठूलो अटो समूहमा सूचीबद्ध हुनेछ। डोङफेङ र चांगनबीच मर्जरका लागि व्यापक छलफल भए पनि अन्तिम सम्झौता भने भइसकेको छैन।
