काठमाडौं। ९९ किलोवाट क्षमताको आधिकारिक डकुमेन्ट बुझाउन नसकेको भन्दै वाणिज्य, आपूर्ति तथा उपभोक्ता संरक्षण विभागले विद्युतीय सवारी (ईभी) गाडी बिक्रेता कम्पनीमा छापा मारेको छ। विभागले ९९ किलोवाट क्षमताको पुष्टि हुने कागजात र खुद्रा मूल्य (एमआरपी) नखुलाएको भन्दै छापा मारेको हो।
विभागले चैत २० गते पत्राचार गर्दै तीन वटा गाडी बिक्रेता कम्पनी र एक विद्युतीय स्कुटर बिक्रेता कम्पनीलाई बिक्री वितरण रोक्का गरेको छ। विभागका अनुसार एमएडब्ल्यू वृद्धि मोटर्स (काठमाडौं–११), पारामाउन्ट मोटर्स (काठमाडौं–१), इभ नेपाल मोटर्स (ललितपुर–१५) र एमएडब्ल्यू वृद्धि अटोकर्प प्रालि (काठमाडौं–११) लाई बिक्री वितरण रोकेर आवश्यक कागजात बुझाउन निर्देशन दिइएको हो।
विभागका महानिर्देशक कुमार दाहालका अनुसार गाडी बिक्रेताले उपभोक्तालाई बेच्ने खुद्रा मूल्यसूची (एमआरपी) पटक–पटक राख्न निर्देशन दिँदा पनि बेवास्ता गरेकाले बिक्री वितरण रोक्नुपरेको हो। उपभोक्ताले देख्न सक्ने गरी एमआरपी राख्नुपर्ने कानुनी व्यवस्था भए पनि गाडी बिक्रेताले त्यसलाई वेवास्ता गरिरहेका कारण कारबाही गरिएको उनले बताए।
बिहीबार पनि विभिन्न ठाउँमा अनुगमन जारी रहेको उल्लेख गर्दै एमआरपी नराख्ने कम्पनीका गाडी बिक्री वितरण तत्काल रोक्ने तयारी भइरहेको उनले जानकारी दिए।
एमएडब्ल्यू वृद्धिले दिपल, सेरेस, नामी ब्रान्डका गाडी बिक्री गर्दै आएको छ भने पारामाउन्टले एमजी र वुलिङ गाडी बिक्री गर्दै आएको छ। इभ नेपालले लेभनिङ ब्रान्डको स्कुटर बिक्री गरिरहेको छ।
यसैबीच बिवाइडी गाडी बिक्रेता साइमेक्स इन्कका प्रमुख कार्यकारी अधिकृत साहिल श्रेष्ठले विभागबाट माग भएका आवश्यक कागजात बुझाइसकेको र पहिलेदेखि नै एमआरपी राखेर बिक्री गरिरहेको बताए। विभागले आफ्नो कम्पनीलाई पनि पत्राचार गरेपछि आवश्यक कागजात बुझाइसकेको उनको भनाइ छ।
-1743662924.jpg)
